Toshkentlik qo‘shiqchi Sardor Milano (Sardor Ishmuxamedov) “Rossiya-1” kanali tashkil etgan “Glavnaya ssena” (“Asosiy sahna”) loyihasining yarim final bosqichiga chiqdi. Loyihada unga rossiyalik taniqli musiqiy prodyuser Konstantin Meladze ustozlik qilmoqda, deb xabar beradi “Kun.uz”.
Sardor chorak finalda Enio Morrikonening “Nella fantasia” kompozitsiyasini ijro etib, hakamlar olqishiga sazovor bo‘ldi.
“Agar bu yigit tanlov g‘olibiga aylansa, unga yordam berganim uchun men ham o‘zimni g‘olib sezaman va bundan faxrlanaman”, – dedi uning prodyusori Viktor Drobish.
“Men Sardordan ham ko‘proq hayajonlandim. Lekin uning o‘zi fantastik ijro etdi. Bizda yaxshi jamoa shakllangan”, – dedi unga ustozlik qilayotgan Konstantin Meladze.
Sardor esa sahnadan tushganidan so‘ng, raqamiga jo‘natilgan minglab xabarlarga dosh bera olmasdan telefoni o‘chib qolgani haqida gapirib, uni qo‘llab-quvvatlagan barchaga minnatdorchilik bildirdi.
https://www.youtube.com/watch?v=jxf-IXTkzvk
Sardor Ishmuxamedovning ijodiy yo‘li “Aladdin” bolalar studiyasida (Toshkent) boshlangan. So‘ngra u fortepiano bo‘yicha Teatr kollejida, 2010-yildan esa Gnesin nomidagi Moskva musiqa bilim yurtida tahsil olgan.
Qo‘shiqchining qobiliyati xalqaro tanlovlarda munosib baholangan: Sardor 2004-yil Qrim va Olma-Otada bo‘lib o‘tgan xalqaro tanlovlar Gran-prisi sohibi, 2011-yil Moskvadagi “Borodino-Xolle”da o‘tkazilgan “Novaya volna-2011” xalqaro tanlovi saralash bosqichining yarim finalchisi, Rossiyada o‘tkazilgan “Yevrovideniye-2012” tanlovining finalchisi hisoblanadi. U, shuningdek, Alla Pugachyovaning “Faktor A” loyihasi saralash bosqichining finaliga chiqqan. 2013-yilda Vitebskda o‘tkazilgan “Slavyanskiy bazar” xalqaro festival-tanlovining diplomanti bo‘ldi.
Qo‘shiqchi yaqin yillarda AQShga borib, u yerda magistraturada musiqa bo‘yicha tahsil olishni rejalashtirmoqda. 10 yildan keyin esa u Rossiya Davlat Kreml saroyida uch kunlik konsert dasturlari taqdim qilishni orzu qiladi.
Izoh (0)