Avstriya poytaxti prokuraturasi 27-fevral, juma kuni xabar berishicha, toksikologik ekspertizaning dastlabki ma’lumotlariga ko‘ra, Vena qamoqxonasida o‘z joniga qasd qilgan Qozog‘istonning sobiq elchisi Rahat Aliyev tinchlantiruvchi preparatlar qabul qilgan. Bu haqda “TASS” xabar berdi.
Prokuratura vakili bayonotida aniqlik kiritilishicha, bunda gap Avstriya hududida deyarli to‘liq taqiqlangan “barbiturat izlari” haqida bormoqda.
Tergovchilar ekspertlarning yakuniy xulosasini bir necha kun ichida tayyorlamoqchi.
Eslatib o‘tamiz, avvalroq Avstriya Adliya vazirligi Qozog‘iston prezidenti Nursulton Nazarboyevning sobiq kuyovi Rahat Aliyev qamoqxonada o‘z joniga qasd qilganini tasdiqlagan edi.
Qozog‘iston Tashqi ishlar vazirligining ma’lum qilishicha, Avstriya rasmiylari Aliyevning Yozefshtadtda joylashgan qamoqxonadagi bir kishilik kamerada o‘z joniga qasd qilgani haqidagi xabarni tasdiqlagan.
Qayd etilishicha, Aliyevni Toshkent vaqti bilan soat 11:20 da nonushta tarqatilayotgan paytda o‘lik holda topishgan. U bintlarga osilgan holda bo‘lgani ma’lum qilingan.
Rahat Aliyev 5-iyun kuni Venada hibsga olingan edi. Qozog‘istonda u sirtdan 40 yilga ozodlikdan mahrum qilingan edi.
Izoh (0)