Xorazm viloyatidagi qishloqda yangi madaniyat markazi ish boshladi
Xorazm viloyati Xonqa tumani Sarapoyon qishlog‘ida madaniyat va aholi dam olish markazi foydalanishga topshirildi. Bu haqda O‘zbekiston Milliy axborot agentligi xabar bermoqda.
Shu munosabat bilan tashkil etilgan tadbirda Prezident rahnamoligida aholi yashash sharoitlarini yanada yaxshilash, turmush farovonligini yuksaltirish, mazmunli dam olishini tashkil etish masalalariga alohida e’tibor qaratilayotgani ta’kidlandi.
Mazkur zamonaviy markazda turli ko‘rgazmalar, tanlovlar, xalq ijodiyoti va tomosha san’ati festivallari o‘tkazish uchun barcha sharoit yaratilgan. Eng muhimi, markaz ishga tushishi bilan 15 kishining bandligi ta’minlandi.
Qishloq ko‘rkiga-ko‘rk qo‘shgan markaz binosida kompyuter savodxonligi, to‘quvchilik, tikish-bichish, musiqa va sport to‘garaklari tashkil etiladi.
