“Real” klubi “Barselona” bilan oradagi farqni 4 ochkoga yetkazib olish imkoniyatini qo‘ldan chiqarmadi. Anchelotti shogirdlari “Elche” ustidan 2:0 hisobida g‘alaba qozondi, deb xabar bermoqda “Stadion.uz”.
“Real” nihoyat yana optimal formaga qaytganini namoyish qildi. Birinchi bo‘limda ular tomonidan yaratilgan ko‘plab vaziyatlar golga aylanmadi. Ronalduning zarbasi darvoza ustuniga tegib qaytgan bo‘lsa, Benzemaning chalqancha uslubda urgan chiroyli goli noto‘g‘ri ofsayd tufayli inobatga olinmadi.
“Elche”ning qarshiligi 56 daqiqa davom etdi. Ronaldu chap qanotdan jarima maydonchasiga kirib keldi va darvozabon maydonchasiga pas berdi. Himoyachi to‘pni qaytardi, ammo to‘p darvozabonga tegib, bo‘sh darvoza chizig‘i oldida turgan Benzemaga kelib tushdi va Karim hisobni ochdi.
Ikkinchi gol ham ko‘p kuttirib qo‘ymadi. Isko chap qanotdan bir himoyachidan qochdi va to‘pni darvozabon maydonchasiga yetkazdi. Ronaldu darvozagacha 9 metrlardan bosh bilan zarba berib, jamoasining ikkinchi goliga mualliflik qildi. Bu Krishtianuning La ligadagi 29-goli bo‘ldi.
“Real” yirik hisob bo‘lmasa ham ishonchli g‘alabani qo‘lga kiritdi. Jamoa o‘z ochkolari sonini 60 taga yetkazib oldi.
Ispaniya La ligasi, 24-tur
“Elche” – “Real Madrid” 0:2
Gollar: 0:1 – 56 Benzema, 0:2 – 69 Ronaldu
“Elche”: Titon, Roko, Albakar, Suares, Lomban, Nyiges (Rodriges, 64), Pashalich (Galves, 75), Rodriges, Fajr, Gonsales (Errera, 81), Jonatas.
“Real Madrid”: Kasilyas, Karvaxal, Varan, Pepe, Marselo, Isko (Arbeloa, 89), Lukas Silva (Ilyarramendi, 84), Beyl, Kroos, Benzema (Xese, 90), Ronaldu.
Ogohlantirishlar: Albakar (24), Marselo (38), Jonatas (40), Nyiges (52), Roko (71).
Izoh (0)