O‘zbekistonda Ikkinchi jahon urushi faxriylariga televizor va mobil telefonlar sovg‘a qilinadi
18-fevral kuni O‘zbekiston Prezidenti Islom Karimov tomonidan tasdiqlangan “Keksalarni e’zozlash yili” davlat dasturida 1941−1945-yillardagi urush va mehnat fronti faxriylariga alohida e’tibor qaratilgan, deb xabar bermoqda “Gazeta.uz”.
O‘zbekiston Mehnat va aholini ijtimoiy muhofaza qilish vazirligi axborot xizmatining “Gazeta.uz”ga ma’lum qilishicha, ularni ko‘plab imtiyoz va imkoniyatlar kutib turibdi.
Jumladan, ularga sog‘lomlashtirish sanatoriyalarida 12 kun davomida bepul davolanish, temiryo‘l transportidan yilda bir marta bepul foydalanish imkoniyati taqdim etiladi, shuningdek tibbiyot sohasida bir qator qulaylik va imtiyozlar joriy qilinadi.
Bundan tashqari, Xotira va qadrlash kuni munosabati bilan faxriylar moddiy rag‘batlantiriladi, ularga analog va raqamli signallarni qabul qiluvchi televizorlar va O‘zbekistonda ishlab chiqarilgan mobil telefonlar sovg‘a qilinadi.
