Toshkent shahridagi Turin politexnika universiteti talabasi bo‘lgan qibraylik Boburjon Zokirov Goldenote mas’uliyati cheklangan jamiyati tashkil etib, unda 20 turdagi o‘quv-uslubiy anjomlar – har xil o‘lchamdagi globuslar, geometrik figuralar, chizg‘ichlar, osma xaritalar ishlab chiqarmoqda. Bu haqda O‘zbekiston Milliy axborot agentligiga tayanib, “Darakchi.uz” xabar beradi.
Korxona oyiga 500 dan 2000 gacha diametri 15, 25, 44 santimetrli globuslarni buyurtma asosida joylarga yetkazib bermoqda. Ular o‘zbek, rus, ingliz tillarida bo‘lib, siyosiy-ma’muriy, tabiiy-geografik turlarga bo‘linadi. O‘zbek tilida lotin alifbosi asosida ishlab chiqarilayotgan globuslar import o‘rnini bosib, ichki bozorni to‘ldirmoqda.
Bu yerda 20 ta ish o‘rni yaratilgan bo‘lib, ilmiy jamoa ayni kunda takomillashtirilgan yangi modellar yaratish ustida izlanmoqda. Eng asosiysi, mahsulotlarning bir qismini eksportga yo‘naltirish rejalashtirilgan.
Yosh tadbirkor an’anaviy o‘tkazib kelinayotgan O‘zbekiston Respublikasi Prezidenti sovrini uchun “Tashabbus” ko‘rik-tanlovining 2014-yilgi Toshkent viloyati bosqichida “Eng yaxshi oilaviy biznes”, mamlakat bosqichida “Yosh faxriy qatnashchi” maxsus nominatsiyasi g‘olibi bo‘lgan. “Yosh tadbirkor – yurtga madadkor”, “Vatanim taraqqiyotiga mening hissam” kabi ko‘rik-tanlovlarda ham munosib ishtirok etib, imtiyozli sarmoya olish huquqini qo‘lga kiritgan.
Izoh (0)