“Adolat” SDP O‘zbekiston Prezidentligiga ko‘rsatgan nomzodini ro‘yxatga olish uchun MSKga hujjatlar taqdim qildi
O‘zbekiston “Adolat” sotsial-demokratik partiyasi Markaziy saylov komissiyasiga O‘zbekiston Respublikasi Prezidentligiga ko‘rsatgan o‘z nomzodini ro‘yxatga olish uchun zarur hujjatlar taqdim qildi. Bu haqda O’zbekiston Respublikasi Prezidenti saylovini yoritish bo’yicha Respublika matbuot markazi xabar berdi.
2015-yil 11-fevral kuni O‘zbekiston “Adolat” sotsial-demokratik partiyasi Markaziy saylov komissiyasiga O‘zbekiston Respublikasi Prezidentligiga ko‘rsatgan o‘z nomzodini ro‘yxatga olishni iltimos qilib partiya rahbarining tegishli arizasi, siyosiy partiya yuqori organining O’zbekiston Respublikasi Prezidentligiga nomzod ko‘rsatish to‘g‘risidagi qarori, siyosiy partiya yuqori organi majlisining O‘zbekiston Respublikasi Prezidentligiga nomzod ko‘rsatish to‘g‘risidagi bayonnomasi, O‘zbekiston Respublikasi Prezidentligiga nomzodning o‘z nomzodi ovozga qo‘yilishiga rozi ekanligi to‘g‘risidagi arizasi, shuningdek partiya tomonidan ko‘rsatilgan nomzodni qo‘llab-quvvatlovchi imzo varaqalarini taqdim etdi.
Markaziy saylov komissiyasi a’zolari, “Adolat” partiyasi hamda ommaviy axborot vositalari vakillari ishtirok etgan tadbirda ta’kidlanganidek, Markaziy saylov komissiyasi hujjatlarni belgilangan muddatda tekshirib chiqadi va ularning qonun talablariga muvofiqligi to‘g‘risida xulosa beradi.
