Estoniya prezidenti Toomas Xendrik Ilves Sky News telekanalidagi to‘g‘ridan-to‘g‘ri efirda teleboshlovchi uni familiyasi bilan atamagani uchun o‘ziga ulangan mikrofonni olib tashlab, intervyuni to‘xtatdi. Bu haqda “Korrespondent.net” xabar bermoqda.
Sky News boshlovchisi Estoniya yetakchisiga Ukrainadagi tanglik fonida Rossiya tomonidan bo‘ladigan ehtimoliy xavf haqida savol berar ekan, uning ismini ikki marta chalkashtirib yubordi. Dastlab boshlovchi Estoniya prezidenti Toomas Xendrikni to‘g‘ridan-to‘g‘ri efirda tanishtirdi, shundan so‘ng u bilan “Xayrli tong, prezident Xendrik…” — deya salomlashdi. Prezident esa quruq kulimsirab, britaniyalik teleboshlovchini tinglamay qo‘ydi, qulog‘i orqasidan o‘tkazilgan mikrofonni yechib tashladi va ko‘zoynagini olib, ism-sharifi noto‘g‘ri aytilgani uchun telekanalning kadr ortidagi xodimlariga tanbeh bera boshladi.
Shundan so‘ng Estoniya prezidenti bir necha soniya jimjitlikda turib qoldi. “Uzr so‘rab qolaman, biz Estoniya prezidenti bilan suhbatlasha olmaymiz shekilli, keling sizga ob-havo haqida qisqacha ma’lumot beraman”, — dedi telekanal boshlovchisi, prezident bilan to‘g‘ridan-to‘g‘ri efir esa uzildi.
Izoh (0)