O‘zbekiston milliy terma jamoasi yarim himoyachisi Sanjar Tursunov ayni vaqtda “Vorskla” bilan Turkiyada yig‘in o‘tamoqda. Yarim himoyachi ukrainalik jurnalistlarga Osiyo Kubogi bo‘yicha intervyu berdi, deb xabar beradi “Stadion.uz”.
Savol: Sanjar, o‘zbek muxlislari terma jamoadan yaxshiroq natija kutgan bo‘lsa kerak?
Javob: Albatta. O‘zimiz ham kamida to‘rt yil oldingi natijani yaxshilashni va medallar bilan qaytishni rejalashtirgandik. Ammo omadimiz kelmadi. Chorak finalda yomon o‘ynamadik, ammo qo‘shimcha bo‘limda koreyaliklarga imkoniyatni boy berdik.
Savol: Ukrainada O‘zbekiston terma jamoasini Maksim Shatskix orqali yaxshi biladilar. Jamoangizga to‘purar hujumchi yetishmadimi?
Javob: Bu hujumchining tajribasi bizga qo‘l kelgan bo‘lardi, albatta. Bizda hozircha Maks kabi to‘purar hujumchi yo‘q. Ammo yosh va iqtidorli futbolchilar bor va ular kelajakda albatta o‘zlarini ko‘rsatadi.
Savol: Bizning eski tanishimiz — ‘Dnepr’ning sobiq futbolchisi Vitaliy Denisovning ishlari qanday?
Javob: Ajoyib. Vitalik – terma jamoamiz yetakchilaridan biri va Avstraliyada kuchli o‘yin namoyish qildi. U bilan bolalikdan tanishmiz. Yetti yoshdan birga o‘ynaganmiz. Yaqinda eski videolavha topib oldik, unda bolalikdagi murabbiyimiz ‘Dinamo’ga qarshi o‘yin oldidan bizga ko‘rsatma berayotgani yozib olingan ekan. O‘shanda biz 11 yoshli bola edik va Ukrainadagi musobaqada g‘olib chiqqanmiz. G‘alabadan so‘ng ‘Dinamo’ bizning tarkibdan 7 nafar bolani tanlab olib, o‘z maktabiga taklif qilgandi. Ammo ota-onamiz uydan uzoqqa qo‘yib yubormagan.
Savol: Terma jamoangizda legionerlar ko‘pmi?
Javob: Yetarlicha. To‘rt yil oldin kam edi, ammo Qatardagi musobaqada muvaffaqiyatli o‘ynagach, yigitlar xorijga taklif ola boshladi.
Savol: Avstraliyadagi musobaqa tashkilotchiligi yoqdimi?
Javob: Ha, hammasi yuqori saviyada edi. Stadionlar yaxshi ekan. Ammo shunga qaramasdan Avstraliyada futbol birinchi o‘rinda turmasligi sezilib turdi. Ularda ko‘proq regbi, kriket va tennisni qadrlashadi. Ayni o‘sha vaqtda Avstraliyada Osiyo Kubogi bilan birgalikda tennis bo‘yicha Avstraliya ochiq chempionati ham o‘tkazilayotgan edi.
Savol: Avstraliya terma jamoasining g‘alabasi hayron qoldirdimi?
Javob: Umuman olganda, ko‘pchilik Yaponiya g‘olib chiqishini kutayotgan edi. Ammo ular sensatsion tarzda chorak finalda BAAga mag‘lub bo‘ldi. Avstraliya terma jamoasi ham ancha kuchli, ular to‘rt yil oldin finalda o‘ynagan edi.
Savol: Finalda Koreyaga muxlislik qildingizmi?
Javob: Yo‘q, men finalni tomosha qilmadim. O‘sha vaqtda “Vorskla” yig‘ini uchun Turkiyaga yo‘l olayotgandim. Keyin qisqa lavhalar tomosha qildim va o‘ylanib qoldim. Janubiy Koreya bizga qarshi kechgan o‘yinda qay darajada omadli bo‘lsa, finalda o‘sha omad ulardan yuz o‘giribdi. Ular ham qo‘shimcha bo‘limlarda mag‘lub bo‘ldi.
Savol: Final o‘yinini hamyurtingiz Ravshan Ermatov boshqarmagani hayron qoldirdimi?
Javob: Ha, bu hammani hayron qoldirdi, chunki u Osiyoning eng yaxshi hakami bo‘lib turibdi. Ammo u Osiyo Kubogi ochilish o‘yinini boshqargan edi. Umuman olganda, Avstraliyada hakamlik u qadar yuqori saviyada bo‘lmadi. Men o‘zimizni oqlamoqchi emasman, ammo hakamlik borasida savollar juda ko‘p bo‘ldi.
Savol: O‘yinlar va mashg‘ulotlardan bo‘sh vaqtlaringizda Avstraliya tabiati bilan tanishdingizmi?
Javob: Bizda vaqt ko‘p bo‘lmadi, chunki har bir o‘yinni turli shaharlarda o‘tkazganimiz tufayli mudom u yoqdan bu yoqqa uchishga to‘g‘ri keldi. Ammo ba’zi narsalarni ko‘rishga ulgurdik.
Savol: Kenguru tomosha qildingizmi?
Javob: Albatta. Hayvonot bog‘iga bordik. Ammo o‘zimiz kutganimizdek ikki metrli kengurularni ko‘ra olmadik, u yerda faqat kichik kengurular bor ekan (kuladi). Yana Sidneydagi mashhur opera teatriga ham bordik. Avstraliya — chiroyli mamlakat.
Savol: Endi O‘zbekiston terma jamoasining rejalari qanday?
Javob: Jahon chempionatiga borish vaqti keldi, deb o‘ylaymiz. Oxirgi saralashda bizga birozgina yetmay qolgan edi. Umid qilamanki, kelgusi safar imkoniyatni qo‘ldan chiqarmaymiz.
Savol: Ta’bir joiz bo‘lsa, kemadan tushganingiz zahoti yana bayramga tutildingiz. Qishda biroz bo‘lsa ham dam oldingizmi?
Javob: Yo‘q (kuladi). Ukrainada birinchi davra yakuniga yetgani hamon terma jamoa yig‘iniga jo‘nab ketdim. Dam olishga mutlaqo fursat bo‘lmadi. Ammo shunga qaramasdan bosh murabbiy Vasiliy Sachkoga rahmat aytmoqchiman. U menga bu yerda, Turkiyada biroz nafas rostlashga imkon berdi. Hozir jamoa bilan birga bo‘lsam-da, mashg‘ulot o‘tamayapman, dam olib, kuch to‘plamoqdaman.