2014-yilda aholi va xo‘jalik yurituvchi subyektlarga qulay va sifatli zamonaviy bank xizmatlarini ko‘rsatish ko‘lamini yanada kengaytirish maqsadida bank hisobvaraqlarini masofadan boshqarish tizimlari (“Bank-mijoz”, “Internet-banking”, “Mobil-banking”, “SMS-banking” va boshqalar)ning O‘zbekiston miqyosida joriy etilishini jadallashtirish bo‘yicha maqsadli ko‘rsatkichlar belgilanib, ularning to‘liq bajarilishiga erishish borasida tegishli tadbirlar ko‘rib borildi. Bu haqda O‘zbekiston Respublikasi Markaziy banki rasmiy saytida qayd etildi.
2015-yilning 1-yanvar holatiga bank hisobvaraqlarini masofadan boshqarish tizimlaridan foydalanuvchilar umumiy soni 534,8 mingtadan ortib, 2014-yil boshiga nisbatan 2 barobarga ko‘paydi. Shundan, “Internet-banking” va “Bank-mijoz” dasturiy majmuasi xizmatlaridan foydalanuvchilar soni 62,2 mingtani tashkil etgan bo‘lsa, “Mobil-banking” va “SMS-banking” xizmatlaridan foydalanuvchilar soni 472,6 mingga yetdi.
O‘z navbatida, bank tizimida naqd pulsiz hisob-kitoblarning zamonaviy shakli — bank plastik kartochkalari muomalasini kengaytirish va takomillashtirishga alohida e’tibor qaratilishi natijasida 2015-yil 1-yanvar holatiga ko‘ra, muomalaga chiqarilgan bank plastik kartalari soni 2014-yilning boshiga nisbatan 2,4 million donaga ortib, 13,4 million donani hamda chakana savdo va pullik xizmat ko‘rsatish subyektlariga o‘rnatilgan to‘lov terminallari soni 2014-yilning boshiga nisbatan 29,3 ming donaga ortib, 159 ming donani tashkil qildi.
Natijada 2014-yil davomida plastik kartalar orqali amalga oshirilgan to‘lovlar hajmi 2013-yilga nisbatan 1,4 barobarga oshib, 22,8 trillion so‘mni tashkil etdi.
Izoh (0)