“Navoiy yo‘lovchi trans” MChJ kredit mablag‘lari hisobiga 16 ta yangi yengil mashina xarid qildi. Bu haqda O‘zbekiston avtomobil va daryo transporti agentligi rasmiy saytida xabar berildi.
2014—2015-yillarda Navoiy viloyatini ijtimoiy-iqtisodiy rivojlantirish dasturida tashuvchi korxonalarning avtotransport parkini yangilash chora-tadbirlari ham nazarda tutilgan bo‘lib, viloyatda bu borada ishlar rejali ravishda amalga oshirilmoqda.
Jumladan, “Navoiy yo‘lovchi trans” MChJ “Ipak yo‘li” bankining mahalliy filialidan olingan kredit mablag‘lariga O‘zbekistonda ishlab chiqarilgan 12 ta Nexia, 2 ta Damas hamda bittadan Lacetti va Cobalt avtomashinalarini xarid qildi. Yangi avtomobillar O‘zbekiston Respublikasi Vazirlar Mahkamasining 2011-yil 18-maydagi “Yo‘nalishsiz taksilar faoliyatini tartibga solish to‘g‘risida”gi 139-sonli qarori talablari asosida jihozlanib, taksi xizmatida qo‘llanilmoqda.
“Navoiy yo‘lovchi trans” MChJ yengil avtomobillarda shaharda va shahar atrofida, shuningdek, avtobuslarda shahar atrofida yo‘lovchi tashish faoliyati bilan shug‘ullanadi. Korxonaga yangi mashinalar keltirilishi munosabati bilan 15 kishi ish bilan ta’minlandi.
Ma’lumot uchun, bugungi kunda viloyatda yo‘nalishsiz taksi xizmati ko‘rsatuvchi 64 ta korxona mavjud. Litsenziyalangan yengil taksi mashinalari soni esa 2060 tani tashkil qiladi.
Izoh (0)