Namanganda xalqaro yo‘nalishlarda xavfli yuklarni tashish bo‘yicha malaka oshirish kursi tashkil etildi. Bu haqda O‘zbekiston avtomobil va daryo transporti agentligi axborot xizmati xabar bermoqda.
2015-yil 13—17-yanvar kunlari Namangan viloyatidagi avtomobil transportida xalqaro tashish faoliyati bilan shug‘ullanuvchi korxonalarning haydovchilari xavfli yuklarni tashish bo‘yicha o‘quv kursida qatnashib, o‘z bilim va ko‘nikmalarini oshirdi.
O‘zbekiston avtomobil va daryo transporti agentligi Namangan hududiy bo‘limida tashkil etilgan ushbu kursda O‘zbekiston Avtomobilda xalqaro tashuvchilar assotsiatsiyasi mutaxassislari — texnika fanlari doktori, professor V.A.Topalidi va texnika fanlari nomzodi N.M.Chubenko xavfli yuklarni tashishning huquqiy va texnik asoslari, o‘ziga xos jihatlari to‘g‘risida ma’ruzalar o‘qidi.
Malaka oshirish kurslarida viloyatdagi “Anas trans servis” MChJ, “Uychi Tigr trans” MChJ, “Nurbek Kargo”, “Jatus trans” MChJ, “Uychi Zarafshon trans servis” MChJ, “Piramida trans” MChJ, “Mega trans servis” MChJ, “Hamkor teks” MChJ kabi korxonalardan jami 30 nafar haydovchi ishtirok etdi.
Agentlikning Namangan hududiy bo‘limi har oyda shaharlararo va xalqaro yo‘nalishlarda tashish bo‘yicha o‘quv kurslarini tashkil qilish va bu ishga avtotransport korxonalarining rahbarlarini ham jalb etishni rejalashtirmoqda.
Izoh (0)