Yaman parlamenti mamlakat rahbariyatining iste’fosini qabul qilmadi
Yaman prezidenti Abd Rabbu Mansur Xadi va bosh vazir Holid Mahfuz Baxax boshchiligidagi hukumat shia isyonchilari bilan kelishuvga erishilganidan bir kun o‘tib iste’fo uchun ariza berdi, deb xabar bermoqda “TASS”.
Dastlab hukumat iste’fosi haqidagi arizani bosh vazir prezidentga jo‘ntagan bo‘lsa, keyin o‘z navbatida prezident o‘z iste’fosini so‘rab parlament raisi Yahyo Ali ar Rayiga murojaat qilgan.
Biroq parlament iste’foni qabul qilmagan. Ar Rayi deputatlar 23-yanvar kuni favqulodda yig‘ilish o‘tkazishi lozimligini ma’lum qilgan. Isyonchilarning “Ansar Alloh” tashkiloti siyosiy byurosi a’zosi Abdul Malik Yusuf al Fishiy esa Xadining iste’fo haqidagi qarorini qo‘llab-quvvatlagan. Mamlakatning ba’zi viloyatlari rahbarlari hukumat buyruqlarini bajarishdan bosh tortgan.
