Qashqadaryolik yosh tadqiqotchi saraton kasalligiga erta bosqichda tashxis qo‘yish imkonini beruvchi kompyuter tomografiyasi yaratdi
Qashqadaryo viloyati Kitob tumanidan bo‘lgan yosh tadqiqotchi Yorqin Toshmurodov yaratgan kompyuter tomografiyasi odam organizmidagi xavfli o‘simtaning bir mikrometrgacha bo‘lgan tugunini ham aniqlay oladi, deb xabar bermoqda “Xalq so‘zi” gazetasi.
Mutaxassislarning ta’kidlashicha, saraton kasalligining o‘nlab turlari mavjud. Afsuski, ularni oldindan aniqlash borasidagi imkoniyatlar hali yetarli emas.
O‘zbekiston Fanlar akademiyasi Fizika-texnika institutida ilmiy izlanish olib borayotgan yosh olimning tadqiqotlari natijasida ushbu xastalikka erta bosqichda tashxis qo‘yish va uning oldini olish imkoniyati yuzaga keldi.
“Tibbiyot muassasalarida foydalanilayotgan tomografiya uskunasi yordamida inson tanasidagi o‘simta yoki tugunning faqat bir millimetrdan bir santimetrgacha bo‘lgan hajmini o‘lchash mumkin, — dedi Yorqin Toshmurodov. — Yangi qurilmaning afzalligi shundaki, u endi paydo bo‘layotgan kasallik tugunchalarini ham boshlang‘ich davridayoq ilg‘ab oladi. Bemorni tekshirish jarayonida rentgen nurlanishi ta’siri amaldagi uskunalarga nisbatan o‘n barobargacha kamayadi”.
Ta’kidlash kerakki, mazkur qurilmadan viloyat shoshilinch tibbiy yordam, onkologiya dispanseri va boshqa tibbiyot muassasalarida keng foydalanish ko‘zda tutilmoqda.
