GM Uzbekistan’ning ishonch telefoni Ravon brendi haqidagi axborotni tasdiqlamadi

GM Uzbekistan kompaniyasining ishonch telefoni Nexia’ning nomi Ravon deb o‘zgartirilishi haqidagi axborotni tasdiqlamadi, deb xabar bermoqda “Kun.uz”.

Ishonch telefonidagi operatorlarning ma’lum qilishicha, zavod 2015-yildagi ishni 20-yanvardan boshlagan, hozircha boshqa yangiliklar yo‘q.

“GM Uzbekistan bilan bog‘liq barcha yangiliklar ‘Chevrolet.uz’ saytida e’lon qilinadi”, — dedi kompaniyaning ishonch telefoni orqali javob bergan vakili.

Avvalroq ijtimoiy tarmoqlarda Nexia’ning nomi Ravon deb o‘zgartirilganini ko‘rsatuvchi, biroq haqiqiyligi tasdiqlanmagan suratlar paydo bo‘lgandi.