O‘zbekiston Ichki ishlar vazirligiga qarashli Respublika “Qo‘riqlash“ birlashmasi tomonidan “Xavfsiz shahar” loyihasi amalga oshirilmoqda, deb xabar beradi “Gazeta.uz”.
Ushbu loyiha doirasida mamlakat bo‘ylab ilg‘or integratsiyalashgan qo‘riqlash va xavfsizlik tizimi joriy etiladi.
Avtomatlashtirilgan markaziy kuzatuv tizimi va texnik qo‘riqlov punktlari xabarnomalarini uzatish tizimi yaratilishi va Respublika “Qo‘riqlash“ birlashmasi bo‘linmalarining harakatga kelishi 2013-yil iyundagi “Milliy axborot-kommunikatsiya tizimini yanada rivojlantirish chora-tadbirlari to‘g‘risida”gi prezident qaroriga ko‘ra amalga oshirilmoqda.
Texnik qo‘riqlash islohoti uch bosqichda amalga oshirilishi rejalashtirilgan bo‘lib, loyihaning sinov bosqichi bir necha hududlarda – Toshkent shahri, Toshkent viloyati, Sirdaryo, Samarqand va Jizzax viloyatlarida 2015-yilning birinchi choragidayoq tugatiladi. Butun respublika bo‘yicha esa 2016-yilning oxiriga qadar davom etadi.
Respublika “Qo‘riqlash“ birlashmasi loyihasi natijasi o‘laroq, qo‘riqlov-yong‘in signalizatsiyasi, kabelli kollektorlar orqali ko‘p qavatli binolarning umumiy eshigi himoyasini hamda avtomobil yo‘llari, bankomatlar, neft va gaz quvurlari va transport vositalarini qo‘riqlashni amalga oshirish imkoni paydo bo‘ladi.
Izoh (0)