Xolokost (Germaniyadagi yahudiylarning ommaviy qirib tashlanishi) qurbonlarini xotirlash xalqaro kuniga bag‘ishlab, Isroil va Germaniyaning O‘zbekistondagi elchixonalari pianinochi Yaron Kolberg (Isroil) va violonchelchi Nikolas Altshtedt (Germaniya) konsertlarini uyushtiradi.
Konsertlar 27-yanvar kuni 18:00 da Toshkentdagi “Turkiston” saroyida hamda 28-yanvar kuni 17:00 da Buxoro viloyat musiqali drama teatrida bo‘lib o‘tadi.
Konsert dasturiga Bax, Shuman, Debyussi, Shostakovich va boshqalarning asarlari kiritilgan.
Yaron Kolberg bir qancha nufuzli xalqaro tanlovlarning g‘olibi hisoblanadi. U Karnegi-holl, Katta Kreml saroyi, Vashingtondagi Kennedi markazi, Jenevadagi Millatlar saroyi va Betxoven-holl kabi dunyoning eng mashhur maydonlarida katta muvaffaqiyatlar bilan konsertlar bergan.
Taniqli musiqachi Boris Pergamenshikovning oxirgi shogirdlaridan biri sanaladigan germaniyalik Nikolas Altshtedt yosh avlod vakillari orasida dunyoning eng yaxshi violonchelchilaridan biri hisoblanadi. Bir qancha xalqaro tanlovlardagi g‘alabalardan va Gustavo Dudamel rahbarligidagi Vena filarmonik orkestri bilan birgalikda Lyutserndagi festival ishtirokidan keyin Nikolas 2010-yili Shveysariyaning Credit Suisse Young Artist Award mukofoti bilan taqdirlangan.
“Turkiston” saroyidagi konsertga bepul chiptalarni saroy kassalaridan 20-, 21- va 22-yanvar kunlari olish mumkin. Buxorodagi konsert uchun bepul chiptalar esa 28-yanvar kuni teatrga kirish vaqtida tarqatiladi.
Izoh (0)