Toshkentda “Zelyoniy chay” kir yuvish kukunini soxtalashtirgan fuqaro qo‘lga olindi
O‘zbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti Toshkent shahar boshqarmasi xodimlari tomonidan o‘tkazilgan tadbirda bir fuqaro belgilangan tartibda ro‘yxatdan o‘tishdan bo‘yin tovlab, xufiyona ishlab chiqarish bilan shug‘ullanayotgani aniqlandi. Bu haqda O‘zbekiston Respublikasi Bosh prokuraturasining “Huquq” nashri xabar bermoqda.
Mazkur shaxs nazorat qilinmaydigan foyda olish maqsadida yashirin sex tashkil qilib, kir yuvish kukunini qo‘lbola tarzda ishlab chiqargan va uni O‘zbekistondagi mashhur Asian Diamond Classik MChJning “Zelyoniy chay” savdo belgisi ostida savdoga chiqargan. Soxta tadbirkorning mahsuloti tekshiruvdan o‘tkazilganda, u inson hayoti va sog‘lig‘i uchun xavfsizlik talablariga javob bermasligi aniqlandi.
Shuningdek, bu fuqaroning Uchtepa tumani hududida joylashgan yashirin sexidan har birining og‘irligi 300 grammdan bo‘lgan 960 dona “Zelyoniy chay” nomli kir yuvish kukuniga o‘xshash modda, mahsulotlarni qadoqlash uchun “Zelyoniy chay” savdo belgili polietilen paketchalar hamda boshqa turdagi asbob-uskunalar va moddalar ashyoviy dalil sifatida olindi.
O‘zganing mualliflik huquqini buzib, noqonuniy boylik orttirishni maqsad qilgan fuqaroga jinoyat ishlari bo‘yicha Uchtepa tuman sudining hukmi bilan tegishli jazo tayinlandi.
