2014-yilning 22-aprelida bo‘lib o‘tgan sud jarayonida 2013-yil 10-fevralidan buyon Qashqadaryo viloyati g‘aznachilik boshqarmasi boshlig‘i vazifasida ishlab kelgan shaxsning qilmishlariga yarasha jazo berildi, deb xabar qilmoqda “Huquq” gazetasi.
Xizmat mavqeidan foydalanib, mulkiy naf ko‘rishni maqsad iqlib olgan mazkur shaxs joylardagi bo‘lim boshliqlarini almashtirish, bir tumandan boshqasiga o‘tkazish yoki ishdan bo‘shatish, ishga qabul qilish o‘zining xizmat vakolatiga kirmasligini, bu ish to‘g‘ridan-to‘g‘ri O‘zbekiston Respublikasi Moliya vazirligining mutlaq vakolati ekanligini bilgani holda, joriy etilgan qonunlarga zid harakat qildi.
Jumladan, u Muborak tumani g‘aznachilik bo‘limi boshlig‘idan shu maqsadlarda 2013-yil aprel oyida 100 dollar, o‘sha yilning iyulida 200 dollar, oktabrida 300 ming so‘m miqdorida pora olib turgan. 2013-yilning 20-noyabrida esa 500 dollarni pora sifatida olayotganda huquqni muhofaza qiluvchi organlar tomonidan qo‘lga olingan.
Sud hujjatlarida keltirilishicha, u g‘aznachilik boshqarmasi xazinachisi bilan til biriktirgan holda 2013-yil mart−oktabr oylarida qator dam olish kunlarini ish kuni deb e’lon qilib, boshqarma nomidan buyruq chiqarib Qarshi shahar, Dehqonobod, Qamashi, Koson, Kitob, Muborak, Kasbi, Chiroqchi va boshqa tumanlarning g‘aznachilik bo‘limlari qator xodimlariga yozilgan maoshlarni o‘zlashtirib olgan.
Moddiy manfaatdorlikning bunday g‘ayriqonuniy yo‘lini qo‘llagan shaxs mansab mavqeini suiste’mol qilib, tumanlardagi g‘aznachilik bo‘limlarida mehnat qilayotgan 38 nafar xodim hisobidan 7 million 412 ming so‘mni o‘zlashtiradi. Sudda u bu qilmishlarini qisman tan olib, yengillik berishni so‘ragan.
Jinoyat ishlari bo‘yicha viloyat sudi 2014-yil 22-aprel kuni ayblanuvchini 3 yil moddiy javobgarlik va mansabdorlik vazifalarida ishlash huquqidan mahrum qildi va unga nisbatan 6 yil muddatga ozodlikdan mahrum qilish hamda eng kam oylik ish haqining 500 baravari miqdorida jarima jazosi tayinlandi.
Shu bilan birga, sud, insonparvarlik tamoyillarini ham nazarda tutib, O‘zbekiston Respublikasi Konstitutsiyasining 21 yilligi munosabati bilan e’lon qilingan amnistiya aktiga asosan, tayinlangan jazoning o‘talmay qolgan muddatini uchdan bir qismga qisqartirish yuzasidan o‘z hukmini e’lon qildi.
Izoh (0)