O‘zbekiston siyosiy partiyalari o‘zlarining Oliy Majlis Qonunchilik palatasidagi yangi tarkibdagi fraksiyalari yig‘ilishini o‘tkazib, fraksiya yetakchilarini sayladi. Bu haqda “Gazeta.uz” xabar bermoqda.
O‘zbekiston Respublikasi Oliy Majlisi Qonunchilik palatasidagi Tadbirkorlar va ishbilarmonlar harakati – O‘zbekiston Liberal-demokratik partiyasi fraksiyasi rahbari etib O‘zLiDeP Siyosiy Kengashi Ijroiya qo‘mitasi raisi S.Turdiyev saylandi. Saylov natijalariga ko‘ra O‘zLiDeP Qonunchilik palatasida eng ko‘p, ya’ni 52 ta deputatlik o‘rniga ega bo‘ldi.
Parlament quyi palatasida 27 o‘ringa ega bo‘lgan O‘zbekiston Xalq demokratik partiyasi fraksiyasi rahbari etib O‘zXDP Markaziy Kengashi raisi, O‘zbekiston Respublikasi Oliy Majlisi Qonunchilik palatasi deputati Hotamjon Ketmonovni saylash to‘g‘risida qaror qabul qilindi.
Tarkibida 20 nafar deputat bo‘lgan “Adolat” sotsial-demokratik partiya fraksiyasi rahbari etib partiya Siyosiy Kengashi raisi, Oliy Majlis Qonunchilik palatasi deputati N. Umarov saylandi.
O‘zbekiston “Milliy tiklanish” demokratik partiyasining Oliy Majlis Qonunchilik palatasidagi fraksiyasi rahbari etib O‘zMTDP Markaziy Kengashi raisi, Qonunchilik palatasi deputati Sarvar Otamuratov saylandi. Ta’kidlash joiz, saylov natijalariga ko‘ra, O‘zMTDPdan Qonunchilik palatasiga 36 nafar deputat saylandi.
Izoh (0)