Odil Ahmedov: Osiyo kubogida to‘rt yil oldingi natijani yaxshilashga qodirmiz

InterFutbol gazetasi so‘roviga ko‘ra, Rossiyaning “Krasnodar” klubi va milliy terma jamoamiz yarim himoyachisi Odil Ahmedov 2014-yilning eng yaxshi futbolchisi, deb topildi. Nufuzli nashr jamoasi Osiyo kubogi musobaqasiga jo‘nab ketishi oldidan Odil bilan tabriklash barobarida undan maxsus intervyu oldi, deb xabar bermoqda “Stadion.uz”.

− Odil, suhbatimiz avvalida sizni gazetamiz tanloviga ko‘ra, 2014 yilning eng yaxshi futbolchisi bo‘lganingiz bilan tabriklaymiz.

− Rahmat. Fursatdan foydalanib, men ham yurtdoshlarimizni yangi yil bilan qutlayman va ularga omad, baxt, muvaffaqiyat tilayman. Shuningdek, meni eng yaxshi sifatida tanlashgani uchun InterFutbol gazetasi xodimlariga minnatdorchilik bildiraman. Futbolchi uchun har qanday e’tirof o‘zgacha ta’sir etadi. Mehnatimning tan olinishi menga qo‘shimcha kuch beradi, mas’uliyatni oshiradi. Endi ovoz berganlar ishonchini oqlash uchun yanada yaxshiroq o‘yin namoyish etishga harakat qilishim tayin.

− Shaxsiy fikringizcha, mamlakatimizning 2014-yilgi eng yaxshi murabbiyi va futbolchisi maqomiga kimlar munosib?

− Murabbiylardan “Paxtakor” ustozi Samvel Babayanni e’tirof etaman. Zero, Samvel Vyacheslavovich asosan yoshlardan iborat va yulduzlarga ega bo‘lmagan jamoa bilan chempion­likka erishdi. Futbolchilarga kelsak, eng yaxshi bo‘lishga munosib o‘yinchilar ko‘p va kimnidir ajratib ko‘rsatolmayman.

− 2014-yilni qanday taassurotlar bilan kuzatdingiz?

− Ta’kidlash joiz, yil men uchun omadli keldi. Mana, “Krasnodar” tarkibida Yevropa Ligasi bahslarida kuchli jamoalarga qarshi maydonga tushib, mahoratimni oshirdim. To‘g‘ri, Yevropa Ligasida klubimiz guruhdan chiqolmadi. Asosiysi, “Krasnodar” yevrokuboklardagi debyut mavsumida chakki taassurot qoldirmadi. Shuning­dek, Rossiya prem­yer-ligasida ham jamoamiz yaxshi o‘yinlar namoyish etib, qishki tanaffusga 4-o‘rinda chiqib ketdi.

− Rossiya premyer-ligasi doirasida SSKAga qarshi kechgan bahsda jarohatlangandingiz. O‘sha jarohat bezovta qilmayaptimi? Sanoqli kunlardan so‘ng Avstraliyada start oladigan Osiyo kubogi o‘yinlariga shaymisiz?

− Futbolchi uchun eng katta dushman − jarohat. Xudoga shukr, jarohatdan forig‘ bo‘ldim. BAAdagi yig‘inda iroqliklarga qarshi ikkinchi o‘rtoqlik uchrashuvida maydonga tushishga ham ulgurdim. Osiyo chempionati bahslari boshlanishiga yana ma’lum vaqt bor. O‘ylaymanki, startgacha optimal formaga kiraman.

− 2011-yili Qatarda o‘tkazilgan Osiyo kubogida jamoamiz 4-o‘rinni egallagandi. Bu safar o‘sha natijani yaxshilash yoki loaqal takrorlash imkoniyati bormi?

− Ayni paytdagi termamiz 4 yil oldingi natijani yaxshilashga qodir. Zero, tarkibimizdan eng kuchli futbolchilar o‘rin olishgan. Barchamiz qo‘limizdan kelganicha ishqibozlar ishonchini oqlab, mazmunli o‘yin namoyish etish va ijobiy natijaga erishishga intilamiz.

− Sanoqli kunlardan so‘ng jahonning 2014-yilgi eng yaxshi murabbiyi va futbolchisi aniqlanadi. Shaxsan siz kimlarni e’tirof etasiz?

− Menimcha, sayyoramizning eng yaxshi murabbiyi − Germaniya terma jamoasi ustozi Yoaxim Lyov, eng yaxshi futbolchisi esa − Krishtianu Ronaldu. Ular uchun 2014-yil juda omadli keldi.