Samarqand viloyatida 2 milliard so‘mdan ziyod mablag‘ga qurilgan sport saroyi foydalanishga topshirildi

Yangi yil bayrami arafasida Samarqand viloyatida O‘zbekiston Bolalar sportini rivojlantirish jamg‘armasi mablag‘lari hisobidan bunyod etilgan 17 ta sport inshooti hamda bolalar musiqa va san’at maktablari foydalanishga topshirildi. Pastdarg‘om tumanidagi “Olimp” bolalar yopiq suv havzasi ana shulardan biri, deb xabar beradi O‘zbekiston Milliy axborot agentligi.

Majmuaning ochilish marosimida Prezident rahnamoligida sportning ommaviyligini ta’minlash, farzandlarimizning yoshligidan sport bilan muntazam shug‘ullanishi uchun zamonaviy sharoitlar yaratishga alohida e’tibor qaratilayotgani ta’kidlandi.

Mazkur sport saroyi qisqa fursatda bunyod etilib, qurilish ishlariga 2 milliard 145 million so‘mdan ziyod mablag‘ sarflandi. Bu yerda yilning istalgan faslida suv sportining bir necha turi bilan shug‘ullanish, yirik musobaqalar o‘tkazish uchun barcha sharoit mavjud.

Tadbirda yosh sportchilarning ko‘rgazmali chiqishlari namoyish etildi.