“Qoraqalpoqtrans” uyushmasi 15 ta yangi Isuzu avtobusini xarid qilib, yo‘nalishlarga chiqardi. Bu haqda O‘zbekiston avtomobil va daryo transporti agentligi axborot xizmati xabar bermoqda.

O‘tgan bir necha oy mobaynida “Qoraqalpoqtrans” avtomobilda yuk va yo‘lovchi tashish Respublika uyushmasi “Asaka” bankining kredit mablag‘lari hisobiga O‘zbekistonda ishlab chiqarilgan Isuzu rusumli avtobuslardan 15 dona xarid qilib, aholi xizmatiga chiqardi. Barcha avtobuslar siqilgan tabiiy gazda yurishga moslab jihozlangan.

Bugungi kunda mazkur uyushma tarkibida faoliyat yurituvchi “Pluton Trans” MChJ uchun 30 ta Isuzu sotib olish rejalashtirilmoqda.

Avvalroq “Ellikqal’a Avtotransservis” MChJ ham “Asaka” banki mahalliy filialining 158 million so‘mdan ziyod kredit mablag‘lari hisobiga 14 o‘rindiqli Isuzu NP37 rusumli avtobuslardan ikkita xarid qilgan edi. Ayni paytda yangi avtobuslar yo‘lovchilarni shahar atrofida tashish huquqini beruvchi litsenziya varaqalari bilan ta’minlanib, Bo‘ston — To‘rtko‘l hamda Bo‘ston — Oqchako‘l yo‘nalishlarida xizmat ko‘rsatmoqda.