“Real” klublar o‘rtasida jahon chempioni nomiga sazovor bo‘ldi

“Real Madrid” 2014-yilni yana bir sovrin bilan yakunlaydigan bo‘ldi. Anchelotti shogirdlari klublar o‘rtasidagi jahon chempionatida bosh sovrinni qo‘lga kiritdi, deb xabar beradi “Stadion.uz”.

Argentinaning “San-Lorenso” klubi finalda madridliklarga jiddiy qarshilik ko‘rsatishga harakat qildi, katta shijoat bilan o‘ynadi. Ular Ronaldu, Beyl va Benzemani jiddiy qo‘riqladi. Ammo Serxio Ramos burchak to‘pidan keyin darvozani ishg‘ol qilib, janubiy amerikaliklarning dastlabki shashtini sindirdi.

Ikkinchi bo‘limda “San-Lorenso” mudofaa vakillari bir soniyaga Beylni ko‘zdan qochirdi va Garet jarima maydonchasi ichida zarba yo‘llab, hisobni 2:0 ga yetkazdi. O‘yin so‘ngida argentinaliklar “Real” darvozasi tomon bir nechta zarba yo‘lladi. Darvozaga to‘g‘ri borgan zarbalarni Kasilyas qaytarishga muvaffaq bo‘ldi.

Krishtianu Ronalduga Marokashdagi musobaqada gol urish nasib etmadi. Shu bois yarim final va final o‘yinlarida bittadan gol urgan Serxio Ramos turnirning eng yaxshi futbolchisi deb topildi. Unga “Oltin to‘p” va Toyota mashinasi taqdim etildi. Krishtianu esa “Kumush to‘p”ni qabul qilib oldi.

Klublar o‘rtasida jahon chempionati, final

“Real Madrid” (Ispaniya) — “San-Lorenso” (Argentina): 2:0 (1:0)

Gollar: 1:0 — 37 Ramos, 2:0 — 51 Beyl.

“Real Madrid”: Kasilyas, Ramos (Varan, 89), Karvaxal (Arbeloa, 73), Pepe, Marselo (Koentrau, 44), Isko, Xames, Beyl, Kroos, Benzema, Ronaldu.

“San-Lorenso”: Torriko, Mas, Kannemann, Yepes (Setto, 61), Buffarini, Kalinski, Mersyer, Barriyentos, Ortigosa, Veron (Romanyoli, 57), Kauteruchcho (Matos, 68).

Ogohlantirishlar: Ortigosa (12), Barriyentos (16), Ramos (22), Karvaxal (30), Buffarini (55), Kannemann (85).