Ukrainadagi Rovno shahridan bo‘lgan 100 yoshli ayol keksalik nafaqasini Yevropa sudi orqali undirishiga to‘g‘ri keldi, deb xabar bermoqda “Segodnya.ua”.
Qayd etilishicha, unga so‘nggi 40 yil davomida biror marta ham pensiya berilmagan. Matrena Bogdanets o‘zining ish tajribasini tasdiqlay olmagani bois pensiyani goh uning hisobiga o‘tkazishgan, goh bekor qilishgan. Arxivdan kerakli hujjatlarni qidirib topishga esa mansabdor shaxslar “erinchoqlik qilgan”.
Natijada ayolning qizi sudlasha boshlagan. Besh yil avval Oliy sud ayolning hisobiga 1600 grivna (taxminan 100 dollar) o‘tkazish haqida hukm chiqargan, biroq hukm bajarilmagan. Tuman pensiya fondi Matrenaning qiyofadoshi paydo bo‘lganini aytib bahona qilgan.
“U ayol ishlagan xo‘jalikda bir-biriga o‘xshash ikki inson bor edi: familiyasi ham, ism-sharifi ham bir xil. Faqat tug‘ilgan yili boshqacha edi”, — dedi Rokitnovsk tuman Pensiya fondi boshqarmasi rahbarining birinchi o‘rinbosari.
Matrena Bogdanetsning qizlari hech taslim bo‘lmay, Yevropa sudiga ariza berdi. Natijada uzoq vaqtdan beri Ukraina sudi hal qilolmagan ishni Yevropa sudi yakunladi va tovon to‘lash hamda mazkur ish bo‘yicha sud hukmini bajarish haqida qaror chiqardi.
Hozirda Matrena Bogdanets pensiya olmoqda. Bundan tashqari, unga 3000 yevro miqdorida tovon to‘landi.
Izoh (0)