Rossiya prezidenti Vladimir Putin “Obshestvennoye mneniye” jamg‘armasi tadqiqotiga ko‘ra mamlakatda ketma-ket 15-marta “Yil odami” deb topildi. Bu haqda “Interfaks” xabar bermoqda.
7-dekabr kuni o‘tkazilgan so‘rovda Rossiyaning 43 hududiy birligidan jami 1500 kishi qatnashgan bo‘lib, ishtirokchilarning 68 foizi Vladimir Putinni siyosatchilar va jamoat arboblari reytingida birinchi o‘ringa qo‘ygan. 2013-yilda bu ko‘rsatkich 32 foizni tashkil qilgani qayd etilgan.
Keyingi o‘rinlardan Rossiya liberal-demokratik partiyasi yetakchisi Vladimir Jirinovskiy (4%), tashqi ishlar vaziri Sergey Lavrov (3%), bosh vazir Dmitriy Medvedev (2%), mudofaa vaziri Sergey Shoygu (1%) va kommunistik partiya yetakchisi Gennadiy Zyuganov (1%) joy olgan.
So‘rov ishtirokchilarining 4 foizi boshqa siyosatchi va jamoat arboblarini ko‘rsatgan bo‘lsa, yana 4 foizi mamlakatda “Yil odami” nomiga loyiq kishi yo‘qligini qayd etgan. 17 foiz ishtirokchilar esa javob berishga qiynalgan.
Izoh (0)