Osiyo Futbol Konfederatsiyasi 29-noyabr kuni Kuala-Lumpur shahrida bo‘lib o‘tgan Qo‘mita yig‘ilishida JCh — 2018 1-saralash bosqichi qur’asi sanasini va saralashning mexanizmini tasdiqladi, deb xabar beradi “Uff.uz”.
Avvalroq Osiyo Futbol Konfederatsiyasi JCh — 2018 saralash bahslari mexanizmiga bir qator o‘zgartirishlar kiritgani va unga ko‘ra JCh — 2018 va OK — 2019 saralash bahslari birlashtirilgani haqida ma’lumot berilgan edi.
OFK tasdiqlagan qarorga ko‘ra, JCh — 2018 Osiyo qit’asi saralash bahslari 1-bosqich o‘yinlaridan boshlanadi. Ushbu bosqichga qur’a tashlash marosimi esa 10-fevral kuni bo‘lib o‘tadi. Ammo mazkur bosqichda nechta jamoa ishtirok etishi JCh — 2018 saralash bahslarida qatnashish uchun berilgan arizalar sonidan so‘ng aniq bo‘ladi.
Agar JCh — 2018 saralash bahslarida ayni damda OFK tasarrufiga kiruvchi barcha 47 ta terma jamoa ishtirok etish istagini bildirsa, 1-saralash bosqichida 14 ta jamoa yettita juftlikka bo‘lingan holda ishtirokini boshlaydi. Uy-safar tizimida o‘tadigan mazkur bosqich o‘yinlari 12 va 17-mart kunlari bo‘lib o‘tadi. Ushbu juftliklarda g‘alaba qozongan jamoalar esa navbatdagi bosqichga yo‘l oladi. Agarda, saralash bahslarida ishtirok etish uchun berilgan arizalar soni 40 tadan oshmasa, u holda 1-saralash bosqichi o‘tkazilmaydi.
Agar 1-bosqich saralash bahslari o‘tkazilmasa, ikkinchi saralash bosqichiga qur’a tashlash marosimi 17-aprel kuni bo‘lib o‘tadi. Ushbu bosqichda 40 ta jamoa har bir guruhda beshtadan sakkiz guruhga bo‘lingan holda kurashni davom ettiradi. Ushbu bosqichda ham har bir jamoa “uy-safar” tizimida bahslashadi. Ya’ni har bir guruhda jamoalar jami sakkiztadan uchrashuv o‘tkazadi. Guruhdagi jamoalar soni toq bo‘lgani uchun, har bir turda ikkitadan uchrashuv o‘tkaziladi va bir jamoa dam oladi.
OFK taqvimiga ko‘ra, ushbu guruh o‘yinlari 2015-yilning 11-iyunidan 2016-yilning 29-martigacha bo‘lib o‘tadi. Tur o‘yinlari bo‘lib o‘tadigan sanalar esa quyidagicha: 11-iyun (1-tur), 16-iyun (2-tur), 3-sentabr (3-tur), 8-sentabr (4-tur), 8-oktabr (5-tur), 13-oktabr (6-tur), 12-noyabr (7-tur), 17-noyabr (8-tur), 24-mart (9-tur) va 29-mart (10-tur).
Guruhda birinchi o‘rinni qo‘lga kiritgan sakkizta jamoa va eng yaxshi ikkinchi o‘rinni qo‘lga kiritgan yana to‘rt jamoa Osiyo Kubogi — 2019 guruh bosqichiga avtomatik ravishda yo‘llanmani qo‘lga kiritadi va JCh — 2018 final bosqichi yo‘llanmasi uchun 3-saralash bosqichida kurashni davom ettiradi. Ikkinchi bosqichda so‘nggi o‘rinni egallagan jamoalar esa OK — 2019 final bosqichining qolgan 12 ta yo‘llanmasi uchun to‘rttadan oltita guruhga bo‘lingan holda kurashni davom ettiradi. Ushbu oltita guruhda birinchi va ikkinchi o‘rinni qo‘lga kiritgan jamoalar OK — 2019 final bosqichiga yo‘llanmani qo‘lga kiritadi. Eslatib o‘tamiz, OK — 2019 final bosqichida avvalgidek 16 ta emas, 24 ta jamoa ishtirok etishi tasdiqlangan.
Izoh (0)