Afg‘on va qirg‘iz aviakompaniyalari Yevropa Ittifoqining “qora ro‘yxati”dan joy oldi
11-dekabr kuni Yevrokomissiya Yevropa Ittifoqi hududiga parvozlarni amalga oshirish imkoniyatidan mahrum qilingan aviakompaniyalar ro‘yxatini qayta ko‘rib chiqdi va ba’zi yangilashlarni amalga oshirdi, deb xabar bermoqda “Kun”.
Bu ro‘yxat 28-iyul kuni tuzilgan edi va Yevropa hududida xavfsizlikni ta’minlash maqsadida Yevroittifoqqa a’zo mamlakatlarning aeroportlariga samolyotlari qo‘nishi taqiqlangan aviakompaniyalarning “qora ro‘yxati” ma’lum qilingan edi. Bu ro‘yxatga Rossiyadagi 10 ta, Bolgariyaning 6 ta, Indoneziya, Angola, Liviya, Qozog‘iston va Pokiston kabi davlatlardagi barcha kompaniyalar kiritilgan edi.
11-dekabr kuni bu ro‘yxatni qayta ko‘rib chiqish davomida Qozog‘istondagi aviakompaniyalardan biri Air Astana hamda Pokistondagi yana bir necha aviakompaniyadan taqiq olib tashlandi. Qirg‘iziston va Afg‘oniston avikompaniyalari esa Yevropa Ittifoqi hududidagi shaharlarga uchishlarni amalga oshira olmaydigan bo‘ldi.
