Nobel mukofoti taqdirlash marosimiga chaqirilmagan mehmon keldi

Norvegiya politsiyasi Nobel mukofoti taqdirlash marosimi vaqtidagi xavfsizlikni ta’minlashda yuzaga kelgan muammo uchun kechirim so‘radi, deb xabar bermoqda “Vesti.ru”.

Tinchlik bo‘yich Nobel mukofotini topshirish vaqtida bu yilgi mukofot sohiblari − pokistonlik Malala Yusufzay va hindistonlik Kaylash Satyarti qarshisida o‘tirgan yosh yigit Meksika bayrog‘ini o‘rtaga chiqarib, ulardan ingliz tilida yaqinda Meksikada talabalar bilan bo‘lib o‘tgan hodisalarni unutmasligini so‘ragan. Qayd etilishicha, u mamlakat janubida o‘g‘irlab ketilgan o‘nlab talabalarning keyinchalik jasadlari topilganini nazarda tutgan.

Tadbirning xavfsizligiga javobgar maxsus xizmat xodimlari zudlik bilan yigitni marosim o‘tkazilayotgan zaldan tashqariga olib chiqqan. Ma’lum bo‘lishicha, chaqirilmagan mehmonning yaqinida Norvegiya qirollik oilasi va hukumat a’zolari o‘tirgan. Ulardan hech biriga zarar yetmagan.