“Biz kelajakka ishonamiz” mavzusida o‘tkazilayotgan yoshlar forumining Andijon viloyati bosqichi yakunlandi, deb xabar beradi O‘zbekiston Milliy axborot agentligi.
O‘zbekiston Respublikasi Prezidentining 2014-yil 6-fevralda qabul qilingan “O‘zbekiston Respublikasida yoshlarga oid davlat siyosatini amalga oshirishga qaratilgan qo‘shimcha chora-tadbirlar to‘g‘risida”gi qarori ijrosi doirasida tashkil etilgan tadbirda tuman va shahar bosqichlari g‘oliblari, Andijon shahridagi bolalar shaharchasi tarbiyalanuvchilari hamda umumta’lim maktablari o‘quvchilari ishtirok etdi.
Tadbirning ochilishida Prezident rahnamoligida yoshlarning iqtidor va salohiyatini yuzaga chiqarish uchun keng imkoniyatlar yaratib berilayotgani, ularni Vatanga muhabbat, istiqlol g‘oyalariga sadoqat ruhida tarbiyalashga alohida e’tibor qaratilayotgani ta’kidlandi.
“Tadbirda profilaktik hisobda turuvchi o‘quvchilar ham ishtirok etib, bu ularning turli sohalarda yuksak natijalarni qo‘lga kiritayotgan tengdoshlariga havas qilgani, ularday faol bo‘lishga astoydil intilishini bildiradi”, — dedi Respublika Ma’naviyat targ‘ibot markazining Andijon viloyati bo‘limi rahbari Abbosbek Isroilov.
Tadbir doirasida ishtirokchilar Andijon shahrining diqqatga sazovor joylariga sayohat qildi, viloyat o‘lkashunoslik muzeyida bo‘lib, O‘zbekiston tarixiga oid eksponatlar bilan tanishdi.
Izoh (0)