“Real” Ispaniya klublari o‘rtasida g‘alabalar seriyasi bo‘yicha yangi rekord o‘rnatdi

Madridning “Real” jamoasi YeChL guruh bosqichi so‘nggi turidan o‘rin olgan “Ludogorets”ga qarshi uchrashuvda 4:0 hisobida g‘alaba qozondi, deb xabar bermoqda “Uff.uz”.

Mazkur zafar bilan Karlo Anchelotti shogirdlari ketma-ket 19-g‘alabani qo‘lga kiritdi va Ispaniya klublari o‘rtasida yangi rekord o‘rnatdi.

Avvalgi rekord “Barselona”ga tegishli edi, kataloniyaliklar 2005-yil oktabr oyidan 2006-yilgacha ketma-ket 18 uchrashuvda g‘alaba qozongandi. “Real” esa o‘zining g‘alabalar seriyasini “Selta”ga qarshi uchrashuvda 18 taga yetkazgan edi.

Aytish joizki, so‘nggi 85 kunda “Real” Ispaniya chempionatida 11 uchrashuvda, YeChLda olti uchrashuvda va Ispaniya Kubogida ikki uchrashuvda g‘alaba qozondi.