Fransiyalik tadbirkor shahar markaziga o‘rnatilishi mumkin bo‘lgan energiya ishlab chiqaruvchi sun’iy daraxtni ishlab chiqdi, deya xabar bermoqda Vesti.ru.
“Shamol daraxti” Jerom Misho-Larivyerning New Wind kompaniyasida ishlab chiqildi. Uning jamoasi Wind Tree prototipini Parijdagi Murosa maydoniga 2015-yil martigacha o‘rnatishni rejalashtirmoqda. Ilk prototip Fransiya shimoli-g‘arbidagi Plyumer-Bodu kommunasidagi bog‘ga o‘rnatildi.
Po‘lat sinchli daraxtning balandligi 11 metr, diametri 8 metrga teng. Undagi 72 ta sun’iy yaproq vertikal o‘qda aylanuvchi mikroturbina vazifasini bajaradi. Ishlab chiquvchilar so‘zlariga ko‘ra, hattoki soniyasiga 2 metr tezlikda esuvchi shamol ham daraxtga qo‘l kelishi mumkin. Miniturbinalarning umumiy quvvati 3,1 kVtga teng.
Ixtiro ko‘cha chiroqlarini quvvat bilan ta’minlashi yoki elektr mashinalar uchun zaryad stansiyasi vazifasini bajarishi ko‘zda tutilgan.
Qurilmaning mukammallashtirilgan versiyasi tabiiy toladan ishlangan barglar, geotermal generator ko‘rinishidagi ildiz va fotoelementlardan iborat po‘stloqqa ega bo‘ladi. U bozorga 29 500 yevro narxda chiqishi taxmin qilinmoqda.
Izoh (0)