Toshkentda chiroq o‘chishi natijasida ishdan chiqqan texnika haqini sud orqali undirish mumkinligi ma’lum qilindi

Toshkent shahar hokimligida 28-noyabr kuni bo‘lib o‘tgan matbuot anjumanida shaharda muntazam ravishda chiroq o‘chishi muammolar muhokama qilindi. Bu haqda “Uz24.uz”ga asoslanib “Kun.uz” xabar bermoqda.

Ma’lum qilishlaricha, agar elektr ta’minotining kutilmaganda uzilishi yoki o‘chirilishi natijasida biror texnika zarar ko‘radigan bo‘lsa, texnika egasi sudga murojaat qilishga haqli.

“Norma.uz”ning xabar berishicha, mulk elektr ta’minotidagi uzilish yoki uning “o‘ynashi” natijasida ishdan chiqqanini belgilash uchun hududiy uy-joy kommunal xizmatida ishlaydigan elektr ustasini, texnika aynan chiroq o‘chgan vaqtda buzilganini qayd etish uchun mahalla qo‘mitasi vakillarini chaqirish kerak bo‘ladi.

Bundan tashqari, elektr ta’minoti nosoz berilganini aniqlash maqsadida elektr ta’minoti xizmatiga murojaat qilish, shuningdek, mulkdor va kommunal xizmatlarni ko‘rsatuvchi shirkat o‘rtasida tuzilgan shartnomani o‘rganib chiqish (ushbu shartnomada shirkat tomonidan ko‘rsatiladigan xizmatlar sifatida qayd etilgan bo‘ladi) tavsiya etiladi.