Tadqiqotchi anakonda ichida o‘tkazgan vaqti haqida gapirib berdi

Eaten Alive (“Tiriklay yeb yuborilgan”) deb nomlangan ko‘rsatuvni suratga olish davomida anakonda tomonidan tiriklayin yutib yuborilgan tadqiqotchi Pol Rozoli ilonning ichida o‘tkazgan vaqti haqida gapirib berdi. Bu haqda NBC telekanali xabar bermoqda.

Anakondaning ichida bir soat vaqt o‘tkazgan Polning aytishicha, ushbu eksperimentdan asosiy maqsadi Amazoniya tropik o‘rmonlari yo‘qolib ketayotgani muammosiga e’tibor qaratishdan iborat.

“Esimda qolgan so‘nggi lahza — boshimni yutishga tayyor turgan ilonning katta ochilgan og‘zi. Shundan keyin atrofimni qorong‘ilik qopladi”, — dedi tadqiqotchi. Pol ilonning ichidan qanday chiqib olganiga aniqlik kiritmadi.

Hayvonlarni muhofaza qilish tashkilotlari tanqidlariga javoban, Rozoli anakondaning eksperimentdan so‘ng tirik qolganini va o‘zini yaxshi his qilayotganini aytdi.

Eaten Alive ko‘rsatuvi Discovery telekanalida 2014-yil 7-dekabr kuni namoyish etilishi rejalashtirilgan.