2014-yilning yanvar-oktabr oylari davomida “Toshshahartransxizmat” kompaniyasi korxonalari haydovchilari aybi bilan sodir etilgan yo‘l-transport hodisalari soni 2013-yilning shu davriga nisbatan sezilarli darajada oshdi. Bu haqda “Poytaxt transporti” gazetasiga “Kun.uz” xabar bermoqda.

Jumladan, haydovchilar aybi bilan 67 ta YTH sodir etilib, 2013-yilning shu davriga nisbatan 4 taga oshgan. YTHlar oqibatida 6 fuqaro vafot etib, bu o‘tgan yilga nisbatan 1 nafarga ko‘p; jarohatlanganlar soni esa 81 nafar bo‘lib, 2013-yilga nisbatan ushbu ko‘rsatkich 3 nafarga ko‘paygan.

Ma’lumotlarga ko‘ra, haydovchilar aybi bilan sodir etilgan YTHlarning 26 tasi yoki 39 foizi piyodani urib yuborish bilan bog‘liq og‘ir hodisaga to‘g‘ri kelmoqda. “Ya’ni, haydovchilar oxirgi paytlarda piyodalarga nisbatan e’tiborsiz munosabatda bo‘lishmoqda, o‘z navbatida, piyodalar ham yo‘lning belgilanmagan joyidan kesib o‘tib, harakat xavfsizligiga rahna solmoqdalar”, – dedi kompaniyaning Yo‘lovchi transportida harakat xavfsizligini ta’minlash xizmati boshlig‘i Muhammadjon Qahhorov.

Qayd etilishicha, avtobuslar orasida eng ko‘p YTHlar Mercedes-Benz Conecto Low Floor avtobuslari haydovchilari tomonidan sodir etilgan (35 ta yoki 52 foiz). Isuzu haydovchilari tomonidan esa 21 ta (yoki 31 foiz) YTHlar sodir etilgan. Tramvaylar orasida esa eng ko‘p YTH “Tatra-3M” haydovchilari tomonidan (5 ta) sodir etilgan, “KTM-619” haydovchilari tomonidan esa 3 ta YTH sodir etilgan.