Toshkent shahrida joylashgan Multimedia umumta’lim dasturlarini rivojlantirish markazida “Boshlang‘ich sinflarda ingliz tilini o‘qitish” mavzusida davra suhbati bo‘lib o‘tdi. Xalq ta’limi vazirligi hamda O‘zbekistondagi Britaniya Kengashi hamkorligida tashkillashtirilgan tadbirda turli vazirlik va idora vakillari, umumta’lim maktablari rahbarlari va chet tili o‘qituvchilari ishtirok etdi. Bu haqda O‘zbekiston Respublikasi Xalq ta’limi vazirligining rasmiy saytida xabar berildi.
Anjumanda so‘zga chiqqanlar Prezident Islom Karimovning “Chet tillarni o‘rganish tizimini yanada takomillashtirish chora-tadbirlari to‘g‘risida”gi qarori asosida olib borilayotgan ishlar va yangiliklar xususida alohida to‘xtalib o‘tdi. 3-sinf o‘quvchilari uchun nashrga tayyorlanayotgan Kids’ English darsligi mualliflari o‘quv qo‘llanmaning qulaylik va afzalliklari haqida fikr bildirdi. Shuningdek, davra suhbatida boshlang‘ich sinflarda ingliz tilini o‘qitishning samarali usullari, pedagoglarning uzluksiz kasbiy malakasini oshirish, o‘quvchilar bilimlarini baholash mezonini o‘rganish masalalari tahlil etildi.
“O‘quv qo‘llanma Respublika ta’lim markazi, Abdulla Avloniy nomidagi xalq ta’limi xodimlarini qayta tayyorlash va malakasini oshirish markaziy instituti, O‘zDJTU huzuridagi chet tillarni o‘qitishning innovatsion metodikalarini rivojlantirish respublika ilmiy-amaliy markazi mutaxassislari tavsiyalari asosida takomillashtirilmoqda”, — dedi Kids’ English darsligi muallifi Lutfullo Jo‘raev.
Ingliz tili o‘qituvchilariga darslikdan unumli foydalanish, mashg‘ulotlarni yuqori saviyada tashkil etish bo‘yicha mutaxassislar tomonidan kerakli tavsiyalar berildi. Ishtirokchilar o‘zaro fikr almashib, o‘zlarini qiziqtirgan savollarga javob oldi.
Izoh (0)