AQShdagi o‘zbekistonlik talabalar nafaqat ta’lim olishadi, balki O‘zbekistonning AQShdagi o‘ziga xos elchilari ham hisoblanishadi. Bu fikrni, “12uz.com” xabariga ko‘ra, AQShning O‘zbekistondagi elchisi Jorj Krol aytib o‘tdi, deb xabar bermoqda “Kun.uz”.
“Amerikaliklar o‘zbekistonlik talabalar orqali sizning mamlakatingiz haqida, uning ko‘p asrlik tarixi va boy madaniyati haqida ulkan axborot olishadi”, – deya qayd etdi AQSh elchisi.
EducationUSA tarmog‘i maslahatchisi Saida Choriyevaning so‘zlariga ko‘ra, 2013−2014-yilgi o‘quv yilida AQSh universitetlarida 463 nafar o‘zbekiston talaba tahsil olgan bo‘lib, bu bir yil avvalgi natijadan (445 nafar talaba) ko‘p, biroq 2010−2011-o‘quv yiliga nisbatan (560 nafar talaba) kam.
Umuman, hozirgi vaqtda AQSh OTMlarida 886 mingdan ortiq xorijlik talaba o‘qiyotgan bo‘lib, ular orasida eng ko‘pini Xitoy (274 mingdan ortiq talaba), Hindiston (102,6 mingdan ortiq), Janubiy Koreya (68 mnigdan ortiq), Saudiya Arabistoni (53,9 mingdan ortiq) vakillari tashkil etadi. MDH mamlakatlari orasida esa Rossiya (5,1 mingdan ortiq) va Qozog‘iston (2 mingdan ortiq) oldingi o‘rinlarda bormoqda.
AQSh elchixonasining madaniyat masalalari bo‘yicha maslahatchisi Lori Treyvisning so‘zlariga ko‘ra, elchixonaning Madaniyat, ta’lim va axborot bo‘limida xalqaro almashuv masalalari bilan shug‘ullanuvchi guruh mavjud. “Biz Oliy va o‘rta maxsus ta’lim vazirligi bilan yaqin hamkorlikda ish olib boramiz”, – deya qayd etdi u.
Treyvisning so‘zlariga ko‘ra, hozirgi vaqtda O‘zbekiston OTMlarida to‘rt nafar amerikalik – uch nafari ingliz tilidan, bittasi esa matematikadan – dars bermoqda. O‘tgan yili esa bir musiqa o‘qituvchisi O‘zbekiston davlat konservatoriyasida ish olib borgan edi.
O‘z navbatida, elchixonada pedagog, olimlar uchun mo‘ljallangan dasturlar ham mavjud. Xususan, ingliz tili o‘qituvchilari 10 oy AQShda o‘qib, yashab kelishlari mumkin. Ularda o‘z malakalarini oshirish va tajriba almashish imkoniyati bo‘ladi. Hozirgacha O‘zbekistonning 56 nafar fuqarosi ushbu dasturda ishtirok etgan.
Izoh (0)