General Motors avtomobillarini chaqirib olish uchun sabablarni ijtimoiy tarmoqlar orqali qidira boshladi

General Motors konserni ijtimoiy tarmoqlar va avtomobil forumlarida o‘z mijozlari xabarlarini kuzata boshladi, deya xabar bermoqda Bloomberg. Shu yo‘l bilan avtomobil ishlab chiqaruvchi o‘z markalariga tegishli mashinalardagi nuqsonlarni aniqlashga harakat qilmoqda.

GM prezidenti Den Ammen so‘zlariga ko‘ra, mutaxassislar sutkada 24 soat ijtimoiy tarmoqlarni, jumladan Twitter’ni kuzatib boradi. Biroq aynan necha kishi bu ish bilan shug‘ullanayotgani ma’lum qilinmadi.

Ammenning qo‘shimcha qilishicha, dilerlar hamda mijozlar bilan ishlash xizmatidan kelib tushayotgan shikoyatlar ham ko‘rib chiqilmoqda.

Bundan tashqari, General Motors prezidenti shaxsan o‘zi va konsern ijro direktori Meri Barra o‘z avtomobillari haqida fikrlar eshitish uchun mijozlar bilan qo‘ng‘iroqlashganini aytdi.