O‘zbekiston Davlat Statistika qo‘mitasi sayyohlarning O‘zbekistondagi sarf-xarajatlarini hisoblab chiqadi

O‘zbekiston Davlat statistika qo‘mitasi tomonidan “O‘zbekturizm” milliy kompaniyasi bilan hamkorlikda kiruvchi va chiquvchi turizm bo‘yicha tanlanma kuzatuv o‘tkazilmoqda. Bu haqda Davlat statistika qo‘mitasi matbuot xizmatiga tayanib, “Kun” xabar bermoqda.

Qayd etilishicha, hozirga qadar kirishga va chiqishga oid turizm bo‘yicha kuzatuv savolnomalari va kuzatuv o‘tkazish joylari tasdiqlangan. Kuzatuv o‘tkazish joylari sifatida Toshkent xalqaro aeroporti, Toshkent temir yo‘l vokzali, Toshkent va Buxoro viloyatlaridagi ayrim bojxona postlari tanlab olingan.

Ta’kidlashlaricha, kuzatuv maxsus tanlab olingan intervyu oluvchilar tomonidan ishtirokchilarning ixtiyoriylik tamoyili asosida o‘tkaziladi. Ma’lumot uchun, kirish va chiqishga oid sayyohlik bo‘yicha kuzatuv turizm sohasidagi xalqaro standartlar va UNWTO tavsiyalari asosida amalga oshirilmoqda.

Kuzatuv natijasida turizm statistikasi ko‘rsatkichlari — sayyohlar oqimi, ularning safardan maqsadi va sayohat davomiyligi, sarf-xarajatlari tarkibi, respublika eksporti (importi)da turizm hajmi, turizm yordamchi hisobi va boshqa statistik ma’lumotlar shakllantiriladi.