Rossiyalik fizik olim Ice Bucket Challenge aksiyasidan ilhomlanib, suyuq azotda cho‘mildi

Rossiyaning Krasnoyarsk o‘lkasida fizik olim Anton Sharipov o‘z ustidan suyuq azot quyib, chiniqmoqda, deb yozadi Vesti.ru. Olimning aytishicha, uni bunga ommalashib ketgan Ice Bucket Challenge aksiyasi undagan.

Anton Sharipov 196 daraja sovuq suyuq azotda ilm-fan tufayli cho‘milayotganini ta’kidladi. Uning aytishicha, har bir murakkab hodisani ilmiy jihatdan tushuntirib berish mumkin. Masalan, uning suyuq azotga cho‘milib, so‘ng hech narsa bo‘lmaganday yurishi azotning o‘ziga xos jihati bilan izohlanadi. Suyuq azotning harorati past, tananiki esa yuqori bo‘lgani sababli, bug‘ qatlami yuzaga keladi, natijada azot tanaga tegmaydi.

Anton Sharipov suyuq azotning bu xususiyatini avvaldan bilganini, biroq shu paytgacha faqat qo‘li yordamida uni sinab ko‘rganini, Ice Bucket Challenge aksiyasi esa uni azotga to‘liq cho‘milishga undaganini aytdi.