Gongkongda multimillionerlar zichligi dunyoda eng yuqori ekanligi ma’lum bo‘ldi
Gongkong bu yerda yashayotgan multimillionerlar zichligi bo‘yicha dunyoda yetakchilik qilmoqda. Bu haqda Singapurning Wealth-X kompaniyasi va Shveysariyaning UBS banki tomonidan o‘tkazilgan tadqiqotga tayanib, “TASS” xabar berdi.
Bunda gap 30 million dollar va undan yuqori mablag‘dagi naqd pulga aylanadigan aktivlarga ega kishilar haqida bormoqda. Shu tariqa, bu yerda har million kishiga 460 dan ortiq o‘ta badavlatlar to‘g‘ri keladi, bu dunyodagi o‘rtacha ko‘rsatkichdan 20 marta ko‘pdir.
Gongkonglik magnatlarning to‘rtdan bir qismi ayollar bo‘lib, bu ham rekord ko‘rsatkichdir. Ularning 9 foizi ko‘chmas mulk orqali boylik orttirgan.
Tadqiqot mualliflari Osiyoda mablag‘i 30 million dollardan ziyod bo‘lgan jami 46 635 kishi borligini qayd etgan. Shularning 14 720 nafari Yaponiyada, 11 070 nafari Xitoyda va 8595 nafari Hindistonda yashaydi. Keyingi o‘rinni Gongkong, Janubiy Koreya, Singapur, Tayvan, Indoneziya, Malayziya va Tailand egallaydi.
