Boshqirdiston Respublikasining Ufa shahrida qo‘lga olingan o‘zbekistonlik firibgar Rossiyaning Privoljskiy transport prokuraturasi tomonidan O‘zbekistonga ekstraditsiya qilinadi, deb xabar bermoqda “RIA Bashkiriya”.
Xabarda aytilishicha, u 2010−2012-yillarda O‘zbekiston Respublikasi vazirliklaridan birida bosh mutaxassis lavozimida ishlagan. Byudjet mablag‘larini o‘zlashtirib olish va kamomad qilish yo‘li bilan o‘g‘irlaganlikda ayblanayotgan firibgar Ufa temir yo‘l vokzalida qo‘lga olingan.
O‘zbekiston Bosh prokuraturasi uni ekstraditsiya qilishni so‘ragan. O‘zbekiston va Rossiya qonunchiligi bo‘yicha jinoiy javobgarlikka tortish muddati tugamaganligi va ekstraditsiya uchun to‘siqlar yo‘qligi bois Privoljskiy transport prokuraturasi ekstraditsiya imkoniyati mavjudligi to‘g‘risida xulosa tayyorlagan.
Rossiya Federatsiyasi Bosh prokurori o‘rinbosari ayblanuvchini jinoiy javobgarlikka tortish uchun O‘zbekiston huquqni muhofaza qilish organlariga topshirish to‘g‘risida qaror qabul qilgan. Hozirda ekstraditsiyani amalga oshirish uchun tayyorgarlik ko‘rilmoqda.
Izoh (0)