Toshkentda UMS dilerlik ofislari ochilishga tayyorlanmoqda

Toshkent shahrida Universal Mobile Systems (UMS) mobil aloqa operatori dilerlik ofislari ochilishga tayyorlanmoqda.

Jumladan, Qo‘yliq mavzesida ochilishi rejalashtirilgan UMS dilerlik ofisi binosi “Daryo” muxbirlari tomonidan suratga olindi.

Shuningdek, Facebook’dagi “Potrebitel.uz” guruhida ham ochilishi kutilayotgan dilerlik ofislarining suratlari joylashtirilgan.

Avvalroq, UMS operatori Farg‘onada sobiq “MTS-O‘zbekistonning” bosh binosida dilerlik shartnomalarini tuzish bo‘yicha murojaatlarni qabul qilayotgani xabar berilgan edi. Bundan tashqari, kompaniya aloqa markazi operatorlarini ishga olish uchun e’lon bergani ham ma’lum qilingan.

Eslatib o‘tamiz, “MTS-O‘zbekiston” o‘rniga tashkil qilingan UMS mobil aloqa operatori o‘z tijoriy faoliyatini 2014-yil 1-dekabrdan boshlashi ko‘zda tutilgan.