O‘zbekistonda o‘tgan haftada sodir bo‘lgan yong‘inlar natijasida 5 kishi halok bo‘ldi

O‘tgan hafta mobaynida O‘zbekiston Respublikamiz hududida 247 ta yong‘in sodir bo‘ldi, deya xabar bermoqda Ichki ishlar vazirligi matbuot xizmati.

Turli sabablarga ko‘ra sodir bo‘lgan yong‘inlarda 9 nafar fuqarolar tan jarohatlari olgan va 5 nafar fuqarolar halok bo‘lgan. Ushbu yong‘inlarda 1 milliard 204 million 113 ming so‘m miqdorida qurilish materiallari va 932 million 181 ming so‘m miqdorida moddiy boyliklar yong‘indan saqlab qolingan.

Farg‘ona viloyati Qo‘qon shahrida joylashgan uylarning birida isitish pechidan sizib chiqqan gaz hidini sezmagan uy egasi J. Holiqova, xonaga kirib elektr chirog‘ini yoqqan vaqtida xonaga to‘plangan gaz va havo aralashmasining chaqnashi sodir bo‘lib, yong‘inga olib kelgan. Yong‘in natijasida uyning 70 metr² maydonda tomi va shift qismi yonib zararlangan. Chaqnash natijasida J. Holiqova va uning 6 yoshli o‘g‘li kuyish tan jarohati olgan holda shifoxonaga yotqizilgan.

Samarqand viloyati Pastdarg‘om tumanida yashovchi O. Rustamovning uyida yong‘in sodir bo‘lib, uyning 80 metr² maydonda tom qismi yongan. Yong‘in elektr simlarining qisqa tutashuvi natijasida sodir bo‘lgan.

Andijon viloyati Marhamat tumanida joylashgan uylarning birida gaz chaqnashi natijasida yong‘in sodir bo‘ldi. Yashash xonasiga o‘rnatilgan isitish pechidan sizib chiqqan gaz hidini sezmagan uy egasi G. Omonova, xonaga kirib elektr chirog‘ini yoqqan vaqtida xonaga to‘plangan gaz va havo aralashmasining chaqnashi sodir bo‘lib, yong‘inga olib kelgan. Yong‘in natijasida uyning 30 metr² maydonda tomi va shift qismi yonib zararlangan. Chaqnash natijasida G. Omonova kuyish tan jarohati olgan holda shifoxonaga yotqizilgan.