Xatolik tufayli hisobiga 1,5 mln dollar pul o‘tkazilgan Credit Suisse banki mijozi qochib ketdi

Credit Suisse banki xatolik natijasida hisobiga 1,5 million dollar o‘tkazib yuborilgan mijozini topa olmayapti. Bu haqda The New York Times xabar berdi.

Ushbu summa 2014-yil yanvarida Credit Suisse tomonidan Royal Bank of Canada’dagi Galbraith Capital Investment Management xedj-fondi hisobiga yuborilgan. Ikki hafta o‘tib, bank xatolikni aniqlagan hamda Galbraith Capital va uning rahbari Jozef Gelbraytdan mablag‘ni qaytarishni so‘ragan. Gelbraytdan javob kelmagan, fond hisobi esa bu vaqtga kelib bo‘sh bo‘lgan.

Avgustda Credit Suisse AQSh sudlaridan birida Florida shtatida ro‘yxatdan o‘tgan Galbraith Capital’ga qarshi da’vo ochdi, biroq ishni ko‘rib chiqish boshlanganicha yo‘q.

Jozef Gelbraytning o‘zi esa NY Times’ga bu da’vodan xabardor emasligini ma’lum qilgan. Bankning shikoyatini esa “bema’ni va kulgili” deb atagan.

Gazetaning yozishicha, Jozef Gelbraytning obro‘siga avval ham bir necha marta dog‘ tushgan, u boshqargan kompaniyalarni firibgarlikda ayblashgan, biroq biznesmenning o‘zi sudga tortilmagan.