Toshkentdagi UMS (“Uyut Mebel Servis” MChJ) mebel fabrikasining sayti joylashgan Ums.uz domeni O‘zbekistonda “MTS” o‘rniga ochiladigan UMS (Universal Mobile Systems) aloqa operatori tasarrufiga o‘tdi.
“UZ” domen zonasi ma’muriyati saytida ushbu domen bo‘yicha qidiruv berilganida uning Universal Mobile Systems MChJga tegishli ekani haqidagi ma’lumotlarni ko‘rish mumkin.
Biroq yangi aloqa operatori ushbu domenga o‘z saytini joylashtirganicha yo‘q: u yerda hamon mebel fabrikasi sayti ishlamoqda.
Ta’kidlash joiz, Ums.uz domeni qanday shartlar ostida Universal Mobile Systems tasarrufiga o‘tgani haqida ma’lumot yo‘q.
Avvalroq O‘zbekistonda yangi ochiladigan UMS aloqa operatori www.umsuz.uz va www.myums.uz domenlarini ro‘yxatdan o‘tkazgani, yangi operatorning saytlari aynan shu domenlarda joylashishi mumkinligi haqida xabar berilgan edi. www.ums.uz domeni esa band bo‘lib, u “Uyut Mebel Servis” MChJga tegishli edi. UMS aloqa operatori ochilishi haqida xabarlar paydo bo‘lganidan beri odamlar adashib shu saytga kira boshlagan. Natijada sayt ko‘rsatkichlari deyarli to‘rt marta o‘sib ketgan.
Eslatib o‘tamiz, Rossiyaning “MTS” mobil aloqa operatori O‘zbekistonda mamlakat hukumati bilan tuzilgan Universal Mobile Systems qo‘shma korxonasi doirasida 1-dekabrda aloqa tarmog‘ini ishga tushiradi. O‘tgan hafta Universal Mobile Systems MChJ qo‘shma korxonasi direktori etib avval “MTS” kompaniyasining Rossiyaning Oltoy o‘lkasidagi filialiga rahbarlik qilgan Dmitriy Nagorniy tayinlangani ma’lum bo‘ldi.
Izoh (0)