Urganch shahrida 28—29-oktabr kunlari “Orol dengizi mintaqasidagi ekologik ofat oqibatlarini yumshatish bo‘yicha hamkorlikni rivojlantirish” mavzusida xalqaro konferensiya bo‘lib o‘tadi. Mazkur tadbir oldidan anjuman ishtirokchilarining ayrimlari o‘z fikrlari bilan o‘rtoqlashdi, deb xabar bermoqda O‘zA.
Xususan, Niderlandiyadagi Yer osti suvlari resurslarini baholash bo‘yicha xalqaro markaz (IGRAC) direktori Neno Kukurich Orol muammosi nafaqat muayyan mamlakat yoki mintaqa, balki jahon hamjamiyati oldida turgan dolzarb masala ekanini qayd etdi: “Urganchda o‘tadigan konferensiya mintaqadagi ekologik ofat oqibatlarini yumshatish bo‘yicha xalqaro hamkorlikni yanada rivojlantirish, ekologik holatni yaxshilashga qaratilgan samarali dastur hamda loyihalarni amalga oshirishga xizmat qiladi.
Suv tanqisligini oldini olishning eng maqbul yo‘li undan samarali foydalanishdir. O‘zbekistonda suv resurslaridan tejamli, maqsadli va oqilona foydalanish choralari ko‘rilayotgani e’tiborga molik. Bu borada mamlakatingizning tegishli vazirlik va idoralari bilan hamkorlikda qo‘shma loyihalar ishlab chiqish va amalga oshirish ustida ish olib bormoqdamiz”.
Malayziya eksport-import banki direktori Ismoil Mahbub esa o‘z nutqini O‘zbekistonga tashrif buyurganidan bag‘oyat xursand ekanligini aytish bilan boshladi: “O‘zbekiston sayyohlik borasida ulkan salohiyatga ega ekaniga amin bo‘ldim. Ko‘plab malayziyaliklar bejiz bu yurtga kelishga katta qiziqish bildirmas ekan. Zero, bu fusunkor va jannatmonand diyorning har qarich yeri muqaddas, har go‘shasi fayzlidir.
Toshkentdagi bir necha banklar faoliyati bilan tanishdim. Shunga ishonch hosil qildimki, O‘zbekistonda g‘oyat barqaror va ishonchli bank tizimi shakllangan. Banklarning puxta mexanizm asosida ish yuritishi menda katta taassurot qoldirdi.
Urganchda o‘tadigan xalqaro anjuman Orolbo‘yi mintaqasi muammosiga yechim topishda muhim ahamiyat kasb etishiga ishonamiz”.
Ispaniyadagi Oproler kompaniyasi direktori Xuan Alberti Orol inqirozining atrof-muhitga, odamlar hayotiga salbiy ta’sirini kamaytirish bugungi kundagi muhim vazifa ekanligini ta’kidladi. “O‘ylaymanki, xalqaro konferensiyada jahon hamjamiyati hamkorligida bu borada samarali loyihalar ishlab chiqiladi.
Konferensiyada suv resurslaridan oqilona foydalanish bo‘yicha O‘zbekiston va boshqa mamlakatlar tajribasini o‘rganish, fikr almashish, axborot olish hamda bu borada qo‘shma loyihalarni amalga oshirish yuzasidan muzokaralar olib borishni rejalashtiryapmiz”, — dedi Xuan Alberti.