JAR milliy terma jamoasi darvozaboni va sardori Senzo Meyiva qurol yordamida otib o‘ldirildi. 27 yoshli futbolchi shifoxonaga yetkazilganida, vrachlar uning halok bo‘lganini ma’lum qilgan, deb xabar bermoqda Stadion.uz.
Ushbu voqea Yoxannesburgga yaqin joyda, taxminlarga ko‘ra, Meyivaning qaylig‘i uyida sodir bo‘lgan. Noma’lum ikki shaxs uyga bostirib kirgan va uchinchisi tashqarida qolgan. O‘q uzilganidan keyin uchalasi ham qochib qolgan. Mahalliy OAV taxminiga ko‘ra, bostirib kirganlar uyni o‘marmoqchi bo‘lgan. JAR politsiyasi qotillar haqidagi har qanday ma’lumotni taqdim etgan shaxsga 14 ming dollar mukofot va’da qilmoqda.
Ta’kidlash lozim, Meyiva shanba, 25-oktabr kuni “Orlando Payrets” klubi safida o‘yin o‘tkazgan. Shuningdek, u JAR milliy terma jamoasi tarkibida Afrika millatlar kubogi saralash bosqichi doirasida 4ta o‘yinida maydonga tushgan.