Ayoli farzandlari bilan qo‘shni viloyatda yashovchi ota-onasini ko‘rgani ketgach, karmanalik shaxs yolg‘iz zerikib qoldi. Pivo ichib bo‘lgach, unda do‘stlari bilan ulfatchilik qilish istagi tug‘ildi. Bu haqda O‘zbekiston Respublikasi Ichki ishlar vazirligining “Postda” gazetasi xabar bermoqda.

Ertasi kuni ulfatchilik va undan keyingi voqealarni xotirlay olmagan karmanalik spirtli ichimlik ta’siri tarqalib ulgurmaganiga qaramay, ayoli va farzandlarini olib kelish uchun yo‘lga otlandi. Avtomashinani o‘t oldirib, musiqani baland ovozda qo‘yib jo‘nab ketdi.

Karmana tumani Malikrabod qo‘rg‘oni hududidan Navoiy yo‘nalishi tomon soatiga taxminan 90 kilometr tezlikda borayotgan haydovchi piyodani payqamay qoldi. To‘g‘rirog‘i, ehtiyot choralarini ko‘ra olmadi. Avtomashina zarbidan yo‘l chetiga uchib ketgan piyodaning joni uzildi.

Karmanalik shaxsning xatti-harakati qonuniy tartibda ko‘rib chiqilib, unga nisbatan tegishli jazo belgilandi.