Rossiya Davlat Dumasi yuqori palatasi − Federatsiya kengashi raisi Valentina Matviyenko Qirg‘iziston prezidenti Almazbek Atambayev va bosh vaziri Joomart Otorbayev bilan uchrashuvdan keyin Bishkek 2015-yil 1-yanvardan Bojxona ittifoqi va Yevroosiyo iqtisodiy ittifoqiga qo‘shilishni istayotganini ma’lum qildi, deb xabar bermoqda Korrepsondent.net.

Matviyenkoning so‘zlariga ko‘ra, Qirg‘iziston joriy yilning so‘ngigacha “yo‘l xaritasi”ni bajarishni tezlashtirishni, Yevroosiyo iqtisodiy ittifoqiga a’zo bo‘lish imkonini beradigan barcha me’yoriy-huquqiy hujjatlar va qonunlarni qabul qilishni istayapti.

Eslatib o‘tamiz, 2015-yil 1-yanvardan kuchga kiradigan Yevroosiyo iqtisodiy ittifoqini tuzish to‘g‘risidagi shartnomani Rossiya, Belorussiya va Qozog‘iston joriy yilning oktabr oyi boshida ratifikatsiya qildi. Shuningdek, Armanistonning ittifoqqa qo‘shilishi to‘g‘risida shartnoma imzolandi. Yevroosiyo iqtisodiy ittifoqi va Bojxona ittifoqi bir-birini to‘ldiruvchi loyihalar hisoblanadi.